* * * * *

கனடா 150

கிழக்கே சில்லென்று அட்லாண்டிக்
மேற்கே சிலுசிலுப்பாய் பசிபிக்
இருபெருங் கடல்களுக்கு இடையில்
வடதுருவத்தின் மடியில்
அமெரிக்காவின் தலையில்
விண்வெள்ளி மகுடமாய்
ஜொலிஜொலிக்கும் வனப்பே

நுங்கும் நுரையும் பொங்கும்
நூற்றைம்பதே வருட இளமையே
உனக்குள்தான் எத்தனை எத்தனைச்
செழுமை வளமை இனிமை

வரம் தரும் தேவதை வாரி வாரி இறைத்த
வைரமணித் தொட்டில்கள்
வசந்தங்கள் தாலாட்ட யொவனம் ததும்ப
நனைந்து நனைந்து மிதக்கும் நந்தவனங்கள்

இலங்கைத் தீவையே
ஒரு கைக் குழந்தையாய் அள்ளி
கனடிய ஏரிக்குள் அப்படியே அமர்த்தி
தலையில் எண்ணையும் தேய்த்து
கொஞ்சம் நீச்சலும் அடிக்க வைத்து
குளிப்பாட்டி மகிழலாமோ என்பதுபோன்ற
மாபெரும் நன்னீர் ஏரிகள்

இவையெல்லாம் வெறும் புற அழகுகள்தாம்
கனடாவின் அக அழகோ
அந்த ஆகாயத்தையே
ஆகச் சிறியதாக்கும் பேரழகு

இன்னல் பிளந்தெடுக்க
சுற்றும் இருளே வாழ்வாக
கண்ணில் மனந்துடிக்க
முற்றும் கிழிந்தே கிடந்தவென்னை
உன்னில் அணைத்தவளே
உயிரின் ஓலம் தணித்தவளே
அன்னம் அளித்தவளே
கருணை அன்பில் புதைத்தவளே
எண்ணம் மதித்தவளே
என்னை எடுத்தும் வளர்த்தவளே
இன்னும் பலவாறாய்
எனக்குள் எல்லாம் ஈந்தவளே
மண்ணே புகலிடமே
என்றன் மற்றோர் தாய்மடியே
உன்னை நினைக்கயிலே
 நன்றி ஊற்றே உயிர்தனிலே

 என்று பாடுகிறான்
 ஓர் அகதியென்றால்
அது
கனடாவின்
ஆன்ம அழகினாலல்லவா?

பிள்ளைக்குப் பிள்ளை
தாய்கூட மாறுசெய்வாள்
தத்துப் பிள்ளைக்கும் மாற்றுச் செய்யா
உத்தமத் தாய் எங்கள் கனடா

வெறிகளெல்லாம் எரிந்து விழ
தெய்வநிலை விரிந்து எழ

போர்முரசுக் கோட்டையின்
தலைக்கு மேலே
நல்லிணக்கம்பாடும்
வெள்ளைப் புறா

அச்சத்தை விற்று நம்பிக்கை
பிரிவினையை விற்று இணக்கம்
வக்கிரத்தை விற்று கருணை
வன்முறையை விற்று அமைதி
கற்றுத்தரும் கனடாவின்
காற்றில் அடர்ந்த ஆக்சிஜன்
இன்னும் ஆயிரம் உலகங்களுக்குப்
போதும் தாராளம்

உலகில்
மற்றன யாவும் நாடு நாடு
எங்கள் கனடா ஒன்றே வீடுகூடு

நூறு நூறு மொழிகள்
வேறு வேறு இனங்கள்
ஊரு ஊராய்த் தேடு
ஒன்றாய் இங்கே பாரு
அது கனடா என்றே கூறு

காற்றில் மூச்சில் கருணை
கனடா மண்ணின் மகிமை
கோடி அன்னை தெரிசா
கூடிச் சேர்ந்த அங்கம்
எங்கள் கனடா என்னும் தங்கம்

கறை ரத்தக் காலடிகளையே
பதித்துவரும் உலகிற்குப்
பொற் பூப் பாதம் பதிக்கப்
பாடம் எடுக்கும் கனடாவே

உன்னை வாழ்த்துவதென்பது
பெற்ற தாயை வாழ்த்துவதல்லவா?

உன்னைப் பாராட்டுவதென்பது
அந்த சொர்க்கத்தையே பாராட்டுவதல்லவா?

அன்புடன் புகாரி

Comments

Popular posts from this blog

பொங்கல் புத்தாண்டு வாழ்த்துக்கள்

அன்புடன் உங்களை அன்புடன் வரவேற்கிறது

சென்னை விழா நன்றியுரை

பிறந்தநாள் வாழ்த்துக்கள்

Ilayaraja Toronto 16 Feb 2013 (Part 1) - இளையராஜா டொராண்டோ

உடல் எடையைக் குறைக்க உருப்படியான வழிகள்

கிறிஸ்துமஸ் வாழ்த்துக்கள்

கள்ளக்காதல் - கள்ளக்கனியே அள்ளச்சுவையே

மகளின் பிறந்தநாள் வாழ்த்து